يعني إيه “ويمنعون الماعون”؟

• يعني حد ناوي يُخرج صدقة لوجه الله فتقوله بدون بينة: أنا مش مستريح للناس دي، فيشك فيهم ويغير رأيه.
• يعني واحد جايله زيادة في مرتبه، فنقف له فيها وكله بقدر الله طبعًا.
• يعني زوجة نفسها تجيب هدية لزوجها، ولما تستشير صديقتها ترد تقولها: مالك مرمية عليه قوي كدا ليه، فتخليها ما تجيبلوش حاجة وتتغير معاه!
• يعني أب عايز يشتري لبنته عربية علشان يصونها من أذى الطريق، فزوجته تقوله الولد أولى.
• يعني اثنين اخوات في الله بيسعوا في الخير والبر، فنحذر أحدهم من ان الآخر بيغير منه وبيحسده.
• يعني ناس بيعاملوا الشغالة بتاعتهم كويس، وييجي ضيف يشككهم فيها ويقلّبهم عليها بدون دليل، فيعاملوها معاملة سيئة وينهروها بعدما كانوا طيبين معاها.
• يعني واحد ناوي يتقدم لواحده فاللي حواليهم ينزغوا بينهم بالنميمة حسدًا.
• يعني عمل خير هيبدأ، فنعمل نفسنا ناصحين وخبرة وبنوعي الناس علشان مصلحتهم، فيتوقف عمل الخير أو يمشي أعرج، أو يمشي بفريق عمل كارهين بعضهم.

يعني إيه “ويمنعون الماعون”؟
• يعني أرحام مقطعة
• وخير مبتور
• وفساد ذات البين
• وبناء لا يكتمل

يعني إيه “ويمنعون الماعون”؟
يعني ربنا يهيأ لنا أسباب الخير واحنا اللي نسعى في منعه من أجل الهوى.
فَوَيْلٌ لِّلْمُصَلِّينَ – الَّذِينَ هُمْ عَن صَلَاتِهِمْ سَاهُونَ – الَّذِينَ هُمْ يُرَاءُونَ …
#ويمنعون_الماعون
حذار، فقد توعّد الله من يفعل ذلك بالويل (جهنم) مع إنه قد يكون بيصلي الصلوات الخمس فيما يبدو للناس.